Milapad na ang karera sa South Korea-based Pinay singer nga si Gwyn Dorado human nahimo siyang usa sa mga naghimo sa Official Theme Song sa sikat nga K-drama nga My Royal Nemesis.
Nailhan si Gwyn sa edad nga 10-anyos, human siya miapil sa Asia’s Got Talent diin nakaabot siya sa grand finals ug nahimong usa sa Top 5 finalists uban sa ubang Pinoy acts sama sa El Gamma Penumbra ug soprano singer nga si Gerphil Flores.
Niadtong 2016, gikanta usab ni Gwyn Dorado ang Philippine National Anthem atol sa katapusang State of the Nation Address ni kanhi Presidente Benigno Aquino III sa University of the Philippines Diliman.
Samtang nagpadayon ang iyang karera, niadtong Pebrero 2024 mipirma siya og lima ka tuig nga kontrata sa A.O Entertainment nga nagbukas sa dalan alang sa iyang pagsulod sa industriya sa K-music.
Sukad niadto, gipagawas niya ang kantang What If nga nahimong opisyal nga soundtrack sa K-drama nga ToGetHer ug gisundan dayon sa digital single nga Way isip iyang opisyal nga debut sa South Korea.
Nakaabot usab si Gwyn Dorado sa grand finals sa Sing Again ug nakadawat sa ikaduhang pinakataas nga boto, uban sa pagdayeg gikan sa mga hurado tungod sa iyang talento sa pagkanta ug pagsulti og Koreanong pinulongan.
Photo Courtesy: The Manila Times
