Kapin sa 2 milyones ka pesos nga smuggle nga sigarilyo ang nasakmit sa mga operatiba gikan sa tulo ka indibidwal atol sa gilusad nga seaborne patrol operation sa Zamboanga del Sur Maritime Police Station sa may kadagatang bahin sa Barangay Sugod, Tukuran, Zamboanga del Sur, adlawng Biyernes, Mayo 22, 2026.
Ang mga nadakpan gilangkuban sa duha ka mga lalaki nga susama nga nagpangidaron ug 29- anyos, ug ang 41-anyos nga lalaki nga pulos mga residente sa Lanao del Sur.
Nabawi sa mga otoridad ang motorized boat nga gitawag sa “Tinanggo” o “Subang-Subang” karga ang mga kinahon nga sigarilyo nga walay BIR tax stamps and graphic health warning signs.
Lakip sa nakumpiska ang 1,750 ka reams sa Astro brand cigarettes nga nagkantidad sa P2,005,500.00 ug ang duha ka SUMO 19HP engines.
Ang suspetsado lakip ang nakumpiskang mga butang gidala sa Zamboanga del Sur Maritime Police Station alang sa tukmang lakang.
