Nakigkoordinar na ang Office of Civil Defense (OCD) Region 9 sa Department of the Interior and Local Government (DILG) Region 9, aron mahatagan ug direktiba ang mga LGUs sa posibleng epekto sa gilauman nga El Niño sa Zamboanga Peninsula Region.
Matod ni OCD 9 Regional Director Atty. Ruel Halanes, kasamtangan na sila nga naghimo ug panag-storya sa DILG 9 aron sila mismo ang magpaabot sa mga LGUs kabahin sa gikinahanglan nga pagpangandam, subay usab sa direktiba ni Presidente Ferdinand Marcos Jr.
Dugang pa niya, usa sa katuyuan nila aron maandam daan ang matag lungsod ug probinsya batok sa posibleng hulaw, kakulang sa suplay sa tubig, ug taas nga kainit nga mahimong makaapekto sa panginabuhi sa katawhan ilabina sa sektor sa agrikultura ug pangisda.
Giingon usab niya, usa sa ilang dakong hagit karon kon unsaon sa pagpasabot sa mga constituents ang epekto sa El Niño gumikan kadaghanan nagtuo nga walay masinati nga ulan kon adunay el Niño.
Lakip sa gilauman nga ipatuman sa mga LGU ang pagpalig-on sa contingency plans, information drive, water conservation measures, ug ubang lakang aron masiguro ang kaandam sa komunidad sa umaabot nga mga bulan.
