Arestado ang usa amahan nga nanigbas sa iyang kaugalingong anak nga natigayon sa may Purok Uno. Barangay Sta. Cruz, Labangan, Zamboanga del Sur, mga alas 10:10 sa gabii, Mayo 20, 2026. Ang suspetsado nga amahan nagpangidaron og 58-anyos, mag-uuma samtang ang iyang anak nga biktima nagpangidaron og 30-anyos.
Subay sa imbestigasyon sa kapulisan, nahitabo ang insidente human sa ilang panaglalis sa wala gitumbok nga hinungdan. Gumikan sa maong panaglalis ang suspetsado kalit nga nanigbas ngadto sa biktima gamit ang sanggot nga miresulta og samad sa biktima igo sa agtang.
Ang biktima dali nga gidala sa tambalanan sa syudad sa Pagadian alang sa dinaliang pagtambal. Samtang ang suspetsado nadakpan sa mga barangay officials nga miresponde dayon sa lugar nahitabuan.
Giturn-over usab ang suspetsado lakip ang nakuha nga butang ngadto sa Labangan MPS alang sa pormal nga pagpasaka sa tukmang kaso.
