Nalambigit sa vehicular accident ang usa ka multicab ug usa ka tourist van sa Barangay Poblacion, Prosperidad, Agusan del Sur, diin parehong adunay sakay nga mga atleta sa Palarong Pambansa 2026.
Ang multicab gi-rent sa MIMAROPA region aron gamiton sa paghatod sa ilang mga delegado nga atleta gikan sa ilang billeting quarters sa Prosperidad National High School paingon ug pabalik sa mga playing venues.
Samtang nagbiyahe pauli ang multicab, nasugatan niini ang usa ka tourist van nga sakay usab og mga atleta gikan sa National Capital Region (NCR) nga bag-o lang gi-sundo sa Butuan City Airport.
Diha-diha dayon nga niresponde ang mga otoridad ug first responders sa lugar. Ang mga nasamdan gilayon nga gidala sa D.O Plaza Memorial Hospital alang sa medikal nga atensyon.
Base sa inisyal nga impormasyon, luwas ug walay grabeng samad ang mga sakay sa van, samtang adunay minor injuries ang pipila ka mga atleta ug coaches nga sakay sa multicab. Ang driver sa multicab nga naipit sa iyang lingkuranan luwas na usab ang kahimtang.
Padayon pa ang imbestigasyon sa kapulisan aron matino ang tinuod nga hinungdan sa aksidente. Sa karon, nagpasidaan ang mga awtoridad sa tanang motorista nga mag-amping ug maghinay sa pagmaneho, ilabi na karon nga busy ang trapiko tungod sa Palarong Pambansa 2026.
