Gibana-bana sa COMELEC-Pagadian nga misaka og 12 porsyento ang gidaghanon sa mga rehistradong botante sa syudad human sa unom ka bulan nga voter registration.
Matod ni Comelec Officer IV Atty. Jed Labador nga mas daghang residente karon ang nagpakita og interes sa pag-apil sa umaabot nga eleksyon.
Sumala niya, dako ang natabang sa mga first-time voters, ilabina sa mga kabatan-onan nga nakaabot na sa legal nga edad sa pagboto, maong nisaka ang ihap sa mga bag-ong rehistradong botante.
Gipadayag usab ni Labador nga misaka ang porsyento sa transfer voter registration, bisan adunay pipila ka mga petisyon nga gihisgutan atol sa ulahing ERB Hearing.
Gipasabot ni Labador nga importante ang aktibong partisipasyon sa katawhan sa demokratikong proseso tungod kay pinaagi sa pagboto, ang publiko adunay gahom sa pagpili sa mga lider nga ilang saligan sa pagdumala sa gobyerno.
Nagpasalamat usab ang COMELEC-Pagadian sa suporta ug kooperasyon sa katawhan nga nakatampo sa malampusong voter registration sa syudad.
