Gitaho sa Kagamhanan sa Dakbayan sa Sugbo ang dakong kalampusan sa ilang dakong operasyon sa pagpanghinlo sa baybayon sa Barangay Pasil, diin gipahibalo ni Cebu City Mayor Nestor Archival nga mokabat na sa 90 porsyento sa natapok nga basura ang nahinloan na.
Matod ni Mayor Archival, nga nagsugod ang pagpanghinlo dili momenus sa 12 ka adlaw na ang milabay isip kabahin sa gihingusgan nga mga programa sa dakbayan alang sa kalikupan.
Tumong sa operasyon nga tangtangon ang mga basura nga natapok sulod sa daghang katuigan sa daplin sa baybayon sa dili pa ipatuman ang pagmintinar ug mga lakang sa pagpugong sa pagbalik niini.
Giangkon sa Mayor nga bisan wala makab-ot sa dakbayan ang orihinal nga target nga mahuman ang pagpanghinlo sa wala pa ang Mayo 7, makita na gihapon ang dakong kausaban sa maong lugar.
Gipadayag usab ni Mayor Archival, nga nakigtambayayong ang dakbayan sa Solid Waste Management Board alang sa usa ka gisugyot nga programa nga magtugot sa mga komunidad nga ibaligya ang ilang makolektang basura imbis nga ilabay kini sa mga suba ug baybayon.
Photo courtesy: Cebu City News
