Hinanaling gipasa ngadto sa hingtungdang komitiba ang gipaabot nga concern kalabot sa peligro nga dala sa mga pedestrian lane nga natanggal na ang mga pintal ug walay saktong suga sa nagkadaiyang dapit dinhi sa dakbayan sa Cagayan de Oro.
Pagpasabot ni Konsehal Christopher George Goking sa iyahang special report kaniadtong nilabayng sesyon, nga gikinahanglan maayo ang mga pintura ug streetlight sa pedestrian lane aron nga mahimong mas luwas dili lang sa mga motorista apan alang sa tanang nagagamit sa kalsada.
Gibase sab kini sa Konsehal sa iyahang personal nga kasinatian sa pagmaheno sa kadalanan sa syudad kung asa iyahang namatikdan nga nanga-papas na ang mga marka sa kadalanan ug kuwang sab sa mga suga.
Tungod niini, gihangyo sa Konsehal ang usa ka committee meeting nga langkuban sa mga committee on public works, engineering, public utilities ug uban pa aron nga mahisgutan ug makakab-ot og maayong plano aron nga matubag kini nga concern sa kadalanan.
Inisyal nga gihisgutan sab ang sugyot sa regular nga pagpintal sa mga pedestrian lain, pagbutang og reflective materials, maayong mga suga nga makadugang sa safety sa mga pedestrian.
Photo courtesy: Cagayan de Oro City Council
