Nipahibawo ang Department of Energy (DOE) nga posibleng magpadayon ang rotational blackout o panagsa nga brownout sa nasod karong tuiga tungod sa hulga sa El Niño.
Matod sa DOE, ang Luzon ug Visayas mahimong makasinati og yellow ug red alert sa umaabot nga mga buwan, nga makaapekto sa bayronon sa kuryente sa Hunyo.
Sa Luzon, laing yellow alert ang gipaabot, samtang sa Visayas ug Mindanao, pito ug unom ka yellow alert ang gikatakdang ipataas. Sa Visayas, posibleng adunay unom ka red alert sa peak hours sa gabii.
Gipasabot ni Energy Undersecretary Felix William Fuentebella nga ang yellow alert nagpakita nga ubos ang power reserves, samtang ang red alert nagpasabot nga kulang ang supply aron matubag ang panginahanglan sa mga konsumidor.
Miingon si Undersecretary Rowena Cristina Guevara nga kining mga alert level mahimong mosangpot sa pagsaka sa singil sa kuryente.
Sumala ni Presidential Communications Undersecretary Claire Castro ang gobyerno sa pagkakaron nagpalig-on sa mga nag-unang linya sa kuryente ug nakigtambayayong sa mga power generation firms aron mabalik ang suplay sa grid.
Photo Courtesy: DOE
