Giawhag si Senador Ronald “Bato” Dela Rosa, sa Lima ka senador gikan sa bag-ong minority bloc sa Senado, nga boluntaryong mosurender sa mga awtoridad. Kini human ang International Criminal Court (ICC) nag-isyu og warrant of arrest batok kaniya kalabot sa kontrobersyal nga “war on drugs.”
Ubos sa Gisugyot nga Senate Resolution No. 395 nga gipetsahan Mayo 12, 2026, sila si Senador Francis Pangilinan, Vicente Sotto III, Panfilo Lacson, Risa Hontiveros, ug Bam Aquino nanghingusog aron mapatuman due process of law.
Sumala sa resolusyon, ang Senado adunay kasaysayan sa pagtahod sa mga proseso sa hudisyal ug mga pag-prosekusyon nga naglambigit sa kaugalingon niining mga miyembro. Gihisgotan nila isip mga ehemplo ang boluntaryong pagsurender ni kanhi Senador Juan Ponce Enrile, ang legal nga hagit ni kanhi Senador Leila de Lima, ug ang mga legal nga lakang nga gihimo ni kanhi Senador Antonio Trillanes IV.
Gipasiugda usab sa mga senador nga ang Senado walay konstitusyonal o legal nga gahum sa paghatag og “protective custody” o paghimo sa bilding nga usa ka dangpanan gikan sa legal nga pag-aresto o pagsurender.
Si Dela Rosa kasamtangang anaa sa sulod sa bilding sa Senado ubos sa “protective custody” samtang naghulat sa desisyon sa Korte Suprema sa iyang petisyon alang sa Temporary Restraining Order (TRO) batok sa warrant sa ICC.
Mahinumduman nga niadtong Lunes, kalit nga mitungha si Dela Rosa sa Senado human sa unom ka bulan nga pagtago. Nakuhaan pa gani og CCTV ang senador nga nagdali padulong sa plenary hall aron malikayan ang mga operatiba sa National Bureau of Investigation (NBI) nga misulay sa pag-serve sa warrant.
Tungod niini, gi-contempt sa Senado ang mga ahente sa NBI ug temporaryo silang gibutang sa kustodiya sa dili pa sila ibalik sa ilang ahensya.
Bisan pa sa panawagan sa minorya, si Senate President Alan Peter Cayetano miingon nga iyang respetuhon ang desisyon ni Dela Rosa nga magpabilin sa Senado hangtod nga mahurot ang tanan niyang legal nga mga pamaagi sa korte sa Pilipinas. Dugang ni Cayetano nga kini usa ka importante nga “test case” para sa nasud tungod kay kini usa ka butang sa hurisdiksyon sa Konstitusyon sa Pilipinas batok sa usa ka langyaw nga korte.
Midumili si Dela Rosa sa pagkomento sa nahisgutang resolusyon, nga nag-ingon nga wala pa niya kini mabasa sa kinatibuk-an.
