Nasakmit sa mga awtoridad ang gibanabana nga P70 milyon hangtod P80 milyon nga kantidad sa gituohang smuggled nga mga sigarilyo nga gibiyaan duol sa Cebu Port Authority sa North Reclamation, Pier 4 sa Dakbayan sa Sugbo.
Matod ni Captain Jerome Lozada sa Philippine Coast Guard, nagsugod ang operasyon human makadawat og report ang mga operatiba niadtong Mayo 11 mahitungod sa gituohang ilegal nga kargamento.
Giingon ni Lozada nga gibantayan sa mga personahe sa Coast Guard ang maong lugar sulod sa pipila ka oras ug sa ulahi nakit-an ang duha ka trak nga nagkarga og container vans nga gikan sa Pier 7.
Gituohang gibulag sa mga trak ang mga container ug dayon misibat, samtang gibiyaan ang mga van sa daplin sa dalan.
Sa inisyal nga inspeksyon nga gihimo uban sa Bureau of Customs, nakaplagan ang di momenos sa 466 ka kahon sa sigarilyo sulod sa usa ka 20-footer container, samtang padayon pa ang ihap sa sulod sa ikaduhang 40-footer container.
Photo courtesy: Philippine Coast Guard
