Nag-viral ang usa ka lalaki nga giilang si Stephen Odhiambo, nga gitawag og “Migori James Bond” human siya mikombitay sa landing gear sa usa ka helicopter nga palupad na gikan sa usa ka kasal sa Rapogi Village, Migori Kenya.
Sumala sa report, wala matod pa, siya pasakya sa helicopter, mao nga iyang gihimo ang peligro nga aksyon nga pagbitay sa gawas sa aircraft bisan pa sa kataas ug kakuyaw niini. Wala gyud siya mobuhi hangtod namatikdan sa piloto nga adunay tawo nga nagbitay.
Tungod sa dakong kapeligrohan sa mga pasahero ug sa mismong lalaki, napugos ang piloto sa paghimo og emergency landing aron luwas nga mapanaog ug malikayan ang posible nga disgrasya.
Human sa insidente, gidakop si Odhiambo ug mag-atubang sa kaso nga disorderly conduct tungod sa pagbutang sa iyang kaugalingon ug sa uban sa peligro. Posible usab siyang mapreso og kapin 18 ka bulan sumala sa report.
Ang maong hitabo nagpahinumdom nga bisan unsa pa ka “action movie” tan-awon ang usa ka buhat, seryoso gihapon ang peligro niini ug mahimong mosangpot sa disgrasya.
Photo Courtesy: A.V FactStories
