Nakakuha og atensyon online, ang usa ka restaurant sa Sydney Australia karon ang human kini nagtanyag og 10% diskwento sa mga kostumer nga mosugot nga ilock una ang ilang cellphone samtang nagkaon.
Simple ra ang lagda: walay cellphone, walay scrolling, ug walay screen time panahon sa ting-kaon. Ang mga diners kinahanglan mobutang sa ilang mga cellphone sulod sa usa ka kahon atubangan sa ilang lamesa, aron makuha ang diskwento ug mas matagamtaman ang tinuod nga panag-istoryahanay uban sa pamilya o mga higala.
Dali kining mikatag sa social media, diin daghang netizens ang miingon nga maayong paagi kini aron mabalik ang tradisyonal nga ka-importante sa dining experience, adunay katawa, eye contact, ug presensya sa matag usa. Sa ubang nasud, adunay mga restaurant nga nagtanyag usab og libre nga wine alang sa mga customer nga dili mogamit sa ilang cellphone samtang nagkaon.
Apan, bisan og daghan ang nakakita niini isip usa ka maayong ideya, adunay uban nga miingon nga makapaguol usab kini huna-hunaon. Matod pa nila, makasubo nga miabot na sa punto nga kinahanglan pa og diskwento o espesyal nga lagda aron lang mahinumduman sa mga tawo ang simpleng pagpakigstorya og tinuod nga koneksyon.
Alang sa uban, ang maong “phone box” dili lang usa ka marketing strategy, kondili usa ka pahimangno kung unsa na kadako ang epekto sa teknolohiya sa personal nga relasyon ug komunikasyon sa karon nga panahon.
Photo Courtesy : Time to log off
