Daling girespondihan sa mga personahe sa Caraga Municipal Police Station ang tawag gikan sa usa ka residente diin gikataho nga adunay batang bag-ong himugso nga gibilin sa bao-bao sa Purok Rose, Brgy. Poblacion, Caraga, Davao Oriental niadtong nakalabay nga adlaw.
Base sa report, namatikdan sa residente sa maong lugar nga adunay nag-uwang nga iro ug human niini adunay nadungog nga kusog nga paghilak sa usa ka bata.
Gilayong gidala ang maong bata sa Municipal Health Center alang sa medikal nga pag-atiman. Samtang nakig-coordinate na usab ang mga otoridad sa Municipal Social Welfare and Development Office kun MSWDO alang sa tukmang pag-atiman ug proteksyon sa bata.
Padayon usab nga gipahinumdom ang mga ginikanan nga kung adunay mga problema nga giatubang, dili lamang basta-basta biyaan o pasagdan ang mga bata, kondili hatagan kini ug hustong pag-atiman, gugma, ug pagtagad aron mapanalipdan ang ilang kaluwasan.
Photo Courtesy: Caraga Wcpd E-Reklamo
