Gibutyag sa mga otoridad ang padayon nga paglapas sa ubang pampublikong jeepney (PUJ) drivers nga gihimong terminal ang mga loading ug unloading area sa city proper, nga maoy hinungdan sa grabeng pagsamot sa trapiko sa kadalanan.
Sa pahayag ni Operation Head Benedicto C. Banares Jr, daghang PUJ drivers ang mopahunong bisan asa aron magsakay ug pasahero ug usahay maghulat pa gyud hangtod mapuno ang ilang sakyanan. Tungod niini, maapektuhan ang dagan sa trapiko ug mahasol ang ubang motorista.
Matod pa niya, klaro nga alang lamang sa paspas nga pagsakay ug pagnaog sa pasahero ang loading ug unloading area, apan gihimo kini sa ubang drayber nga murag permanenteng terminal.
Mas nabantayan usab ang maong problema panahon sa gabii diin adunay mga PUJ nga maglinya sa dalan bisan wala man opisyal nga terminal ang ilang rota sa city proper.
Tungod niini, gipahigayon karon sa mga otoridad ang mas hugot nga operasyon batok sa mga PUJ nga molapas sa balaod sa trapiko. Posibleng dakpon ug silotan ang mga drayber nga mag-illegal parking, maglinya sa dalan, ug maghimo og terminal sa dili angay nga lugar.
Naghangyo usab ang mga otoridad sa kooperasyon sa mga drayber sa pampublikong sakyanan aron mapadayon ang kahapsay sa trapiko ug malikayan ang dugang nga kasamok sa mga kadalanan sa dakbayan.
