Nagpadayon ang Local Government Unit (LGU) sa Iligan sa implementasyon sa programang “Hapsay Linya” isip kabahin sa kampanya aron maorganisa ug malimpyohan ang mga “spaghetti wires” sa kadalanan sa syudad.
Matod pa sa mga opisyal, responsibilidad sa City General Services Office (CGSO) ang pagpanghipos sa mga wire aron dili kini mabilin sa dalan human sa clearing operations.
Giklaro usab nga adunay nakatalagang departamento sa LGU nga maoy mokuha ug mohipos dayon sa mga natangtang nga wire aron malikayan ang kalat ug peligro sa publiko.
Sumala sa report, sa miaging tuig lamang, nakaipon ang LGU og duha ka mini dump truck nga puno sa mga wire nga gitangtang gikan sa Quezon Avenue.
Apan, temporaryong napahunong ang maong programa human maapektuhan sa Bagyong Basyang ang operasyon sa clearing team.
Gipasabot ni Armien P. Alloron nga dili lamang kini usa ka temporary nga proyekto kondili usa ka padayon nga programa sa syudad aron masiguro ang kahapsay sa mga linya sa kuryente ug komunikasyon sa mga kadalanan sa Iligan.
Dugang pa niya, magpadayon ang operasyon hangtod nga hingpit nga mahapsay ang mga linya aron masiguro ang kaluwasan sa publiko ug mas maayong dagway sa syudad.
