Gibutyag sa usa ka opisyal sa lungsod sa Nabunturan, Davao De Oro nga dili bug-at ang mga hagit karon sa pagdumala sa lokal nga panggamhanan tungod sa panaghiusa sa mga lider sa probinsya ug munisipyo. Kini gibutyag ni Franklin Alipan atol sa pagpakighinabi sa Juander Radyo News Team. Matod pa niya, nagkahiusa karon ang tanang lider nga maoy hinungdan sa mas paspas nga pagproseso sa mga dokumento ug implementasyon sa mga proyekto sa lungsod.
Dugang pa niya nga isip mga SB Member, ilang ginabuhat ang ilang katungdanan sa pagpanday og mga balaod aron dali kining ma-implementar sa mayor ug sa lokal nga panggamhanan. Giingon usab niya nga daghan na sa mga konsehal ang adunay mga gipanday nga ordinansa ug programa alang sa kaayohan sa katawhan.
Sa laing bahin, anaa pa sa committee hearing level ang usa sa iyang gipanday nga balaod ug wala pa kini moagi sa public hearing. Ang maong balaod nagtumong sa paghatag og dugang suporta sa mga personnel nga nag-atubang og hazardous nga trabaho, ilabina sa mga miyembro sa Nabunturan Emergency Response Team o NERT nga pirming nagaresponde sa rescue operations ug uban pang emerhensiya.
Apil sa gihisgutan sa opisyal ang epekto sa Shear Line nga nakaigo niadtong mga nakalabayng bulan, diin naghimo siya og privilege speech aron pasalamatan ug i-recognize ang dedikasyon ug paningkamot sa mga rescuer ug personnel nga mitabang atol sa kalamidad.
