Nagpadayon sa mas hugot nga operasyon batok sa mga lumalapas sa balaod trapiko ang Iligan City Traffic Parking Management Office (ICTPMO), ilabi na karon sa kampanya kontra illegal parking sa nagkalain-laing dalan sa syudad.
Sumala ni Benedicto C. Bañares Jr., dugang pwersa na ang gipakatap aron mas mapalig-on ang pagmonitor ug pagpatuman sa mga regulasyon sa trapiko.
Matod pa ni Bañares, adunay duha ka sakyanan nga pirming naglibot sa tibuok dakbayan aron bantayan ang mga motorista nga ilegal nga nagaparking sa mga dalan ug pampublikong lugar.
Gibutyag usab niya nga daghan na ang napahamtangan og silot human madakpan nga nakalapas sa balaod trapiko, ilabi na sa illegal parking nga maoy usa sa dakong hinungdan sa pagsamot sa kahuot sa dalan sa syudad.
Padayon usab nga nag-awhag ang ICTPMO sa mga motorista nga motuman sa traffic rules ug magparking lamang sa gitugot nga lugar aron malikayan ang silot ug masiguro ang hapsay nga dagan sa trapiko sa Iligan City.
