Gihatagan ug dakong pagtagad sa City Veterinary Office (CVO) sa Iligan ang ilang mga programa alang sa animal health pinaagi sa aktibong partisipasyon sa “Serbisyo Caravan,” usa ka programa sa Lokal nga Gobyerno sa Iligan diin nagkahiusa ang tanang opisina ug ahensya sa City Hall aron madala ang serbisyo publiko ngadto sa mga barangay.
Matod ni Lito U. Macapil, kabahin sa ilang ginahatag nga serbisyo atol sa caravan mao ang libreng purga sa mga hayop ingon man pagpanagtag og sachet sa antibiotic ug bitamina alang sa mga alagang hayop ug kahayopan sa komunidad.
Gipasabot ni Macapil nga gawas sa Serbisyo Caravan, nagpadayon usab ang ilang opisina sa regular nga pagbisita sa mga barangay aron mapadayon ang veterinary outreach ug mas mapalapdan pa ang ilang serbisyo ngadto sa katawhan.
Dugang pa niya, aktibo usab ang City Veterinary Office sa libreng vaccination program alang sa mga iro ug iring nga ginahigayon sa duha ka barangay matag semana aron mapugngan ang rabies ug mapanalipdan ang kahimsog sa publiko.
Pinaagi sa padayon nga veterinary services sa barangay level, tumong sa City Veterinary Office nga mapalambo ang animal welfare ug masiguro ang kahimsog sa mga kahayopan isip kabahin sa pagpalig-on sa serbisyo publiko sa Iligan City.
