Gipadali karon sa Department of Trade and Industry (DTI) Davao de Oro ang mga transaksyon sa negosyo pinaagi sa paggamit sa mga online platform, sumala sa usa ka opisyal sa probinsya.
Matod ni DTI Provincial Director Art Hermoso, ang implementasyon sa online transactions usa ka lakang aron mapaspas ug mapahapsay ang serbisyo sa gobyerno alang sa mga negosyante ug konsumidor. Dugang niya, kabahin kini sa padayon nga paningkamot sa ahensya nga mapaayo ang ease of doing business ug makunhuran ang kahasol sa manual nga proseso.
Gipasabot usab ni Hermoso nga bisan pa sa digitalization, dili malikayan nga adunay mga indibidwal nga dili pa kaayo hanas sa paggamit sa online systems.
Tungod niini, nagpadayon gihapon ang ilang pagdawat og walk-in clients, ilabina ang mga senior citizens ug uban pang sektor nga nanginahanglan og personal nga tabang.
Sa kinatibuk-an, gilauman nga ang pagpalapad sa online transactions sa DTI makahatag og mas paspas, episyente, ug mas accessible nga serbisyo alang sa tanang sektor sa negosyo sa Davao de Oro.
