Mikunhod ang mga kaso sa illegal recruitment ug human trafficking sa Zamboanga Peninsula base sa pinakabag-ong datos gikan sa Department of Migrant Workers (DMW) Region 9.
Matod ni DMW 9 Regional Director Iris Gay Tangcalagan, ang pag-ubos sa kaso resulta sa padayon nga kampanya batok sa illegal recruitment, mas hugot nga border monitoring, ug aktibong information drive sa komunidad aron maprotektahan ang mga indibidwal nga nangita og trabaho sa gawas sa nasud.
Gipasiugda usab niya nga dako ang natabang sa koordinasyon sa nagkalain-laing ahensya sa gobyerno aron mapugngan ang operasyon sa mga illegal recruiters ug traffickers.
Bisan pa sa pagkunhod sa kaso, nagpadayon ang pagpahimangno ni Tangcalagan sa publiko nga magmatngon ug likayan ang pag-aplay sa trabaho nga walay klarong dokumento o dili lehitimo.
Gidasig usab niya ang mga aplikante nga mokonsulta una sa Department of Migrant Workers ug sigurohon nga lisensyado ang recruitment agency aron malikayan ang pagkahulog sa modus sa illegal recruitment ug human trafficking.
