Nakit-an na ang patayng lawas sa usa ka mananagat nga giilang si Jeorgen Pasco Pamaus, 68-anyos, residente sa Purok 3, Barangay Tag-anongan, lungsod sa Cortes, Surigao del Sur.
Base sa inisyal nga imbestigasyon, nadiskobrehan sa mga kaubanang mananagat sa maong barangay ang patayng lawas ni Pamaus ug ilang gilayon gidala sa daplin sa baybayon. Gikumpirma usab sa mga kabanay ang maong patayng lawas.
Matod pa sa mga report, niadto pang Mayo 3, 2026 migawas si Pamaus aron mangisda apan wala na makabalik.
Padayon pa karon ang imbestigasyon sa mga otoridad aron matino ang eksaktong hinungdan sa iyang kamatayon. Samtang, nagpadayon usab ang pahimangno sa publiko, ilabi na sa mga mananagat, nga mag-amping ug sundon ang mga safety measures sa matag paglawig sa dagat.
Photo courtesy: Rosema Bikay
