Nadakpan sa kapulisan ang usa ka 41-anyos nga lalaki nga gilakip sa listahan sa most wanted person atol sa operasyon nga gipahigayon alas 4:30 sa hapon, Mayo 4, 2026 sa Purok 3, Barangay Das-agan, lungsod sa Barobo, Surigao del Sur.
Gidumala ang operasyon sa mga kapulisan sa lokal nga estasyon ubos sa pagpangulo ni PCMS Erwin B. Manticahon, Intel PNCO, ilawom sa superbisyon ni PMAJ John Zydrick A. Preciados Acop, uban ang SDSPPO-Provincial Intelligence Unit nga gipangulohan ni PMAJ Corby B. Piligan.
Ang suspek, usa ka minero ug residente sa Purok 3, Sitio Garden, Barangay Tambis, Barobo, nadakpan pinasikad sa warrant of arrest nga gipagawas sa korte.
Base sa rekord, ang maong warrant of arrest naggikan sa Criminal Case No. 2005-09-2960-T alang sa kasong robbery with frustrated homicide, nga gipirmahan ni Hon. Merlyn B. Pacaro-Cañedo, Presiding Judge sa RTC Branch 29 sa Bislig City niadtong Septiyembre 27, 2005. Girekomenda usab ang piyansa nga nagkantidad og ₱100,000.
Sa pagkakaron, anaa na siya sa kustodiya sa Tagbina Municipal Police Station alang sa hustong disposisyon.
Photo courtesy: Barobo MPS
