Nasamdan ang usa ka 21-anyos nga babayeng estudyante human gipusil sa wala mailang suspetsado nga nahitabo sa may Purok 5, Barangay Bagong Oroquieta, Guipos, Zamboanga del Sur, kagahapon sa hapon, Abril 29, 2026.
Base sa imbestigasyon, ang biktima usa ka 4th year college student ug residente sa Margosatubig, Zamboanga del Sur. Nagsakay matod pa ang biktima og motorsiklo kauban ang iyang boardmate padulong sa ilang boarding house sa dihang gisundan sila sa usa ka wala mailhing suspek nga sakay usab og motorsiklo, ug kalit lang gipusil ang biktima.
Human sa pagpamusil, ang suspetsado daling mikalagiw paingon sa Barangay Mati, San Miguel. Samtang ang biktima naka-angkon og samad pinusilan sa likod sa ulo ug gidali dayon og dala sa ospital aron matambalan.
Gihimo dayon sa kapulisan ang follow-up operation ug nagpadayon sa hot pursuit batok sa suspetsado nga nakasibat. Padayon karon ang imbestigasyon sa mga otoridad diin unang gilantaw nga motibo sa kremin mao ang personal nga kalagot sa suspetsado ngadto sa biktima.
