Mokabat sa 419 ka starter kits ang giapud-apod sa Technical Education and Skills Development Authority (TESDA) Zamboanga del Sur ngadto sa mga benepisyaryo sa Special Training for Employment Program (STEP) gikan sa nagkalain-laing kurso sa lima ka eskwelahan sa Probinsya nga gihimo sa Provincial Capitol Covered Court sa Barangay Sto.Niño Pagadian, kagahapon, Abril 29, 2026.
Ang kalihukan gipanguhan ni Engr. Samad Dibansa, Provincial Director sa TESDA ZDS. Samtang nahimong guest speaker sila Zamboanga del Sur Gov. Divina Grace Yu, 1st District Congressman Joseph Kim Yu ug 2nd District Victoria Yu.
Ang mga benipisyaryo gikan sa Provinical Training Center – Pagadian, Molave Agri Industrial Technology, Inc. West Prime Horizon Institute Inc. Crestview Technical Vocational Institute and Assessment Center Inc. ug Our Lady of triumph Institute of Technology.
Lakip sa mga kurso nga nakabenepisyo ang Shielded Metal Arc Welding (SMAW NC II), Electrical Installation and Maintenance (EIM NC II), Bread and Pastry Production, Dressmaking NC II, Bread and Pastry Production (BPP) ug Cookery.
Giingon ni PD Dibansa ang matag starter kit naglangkob sa mga kagamitan nga angay gamiton sa tagsa-tagsa ka kurso, aron mas mapalambo pa ang ilang abilidad ug madugangan ang ilang oportunidad sa trabaho og gipanghinaut niya nga dili unta kini ibaligya sa mga benepisyaryo.
Samtang gibutyag ni Governor Yu nga adam modugang ug pondo ang probinsya og congressional district aron matabangan ang mga nakahuman sa training nga makasugod dayon og panginabuhian pinaagi sa paggamit sa ilang nakuha nga kahanas ug kahibalo.
Gilauman sa Gobernadora nga pinaagi niini, mas daghang benepisyaryo ang mahimong produktibo ug makatampo sa pagpalambo sa ekonomiya sa Zamboanga del Sur.
