Nakabenepisyo ang 200 ka mga Irrigator’s Association sa bag-ong gilusad sa Department of Labor and Employment (DOLE) Region 9 nga “Wet-to-Dry Project sa Mahayag Zamboanga del Sur, adlaw’ng Martes, Abril 28, 2026.
Ang inisyatiba kabahin sa inter agency convergence sa DOLE-9, NIA-9, DA-9 ug sa LGU Mahayag nga tumong sa pagpalig-on sa panginabuhian sa mga mag-uuma ug mapauswag ang climate resilience sa komunidad.
Sumala ni DOLE-9 Regional Director Albert E. Gutib, ang 200 ka benepisyaryo ang makapahimulos sa 20 ka adlaw nga emergency employment pinaagi sa TUPAD program.
Lakip sa ilang trabaho ang desilting sa irrigation canals, paglimpyo sa palibot, site preparation, ug pag-atiman sa mga tanom palibot sa Mahayag Dam.
Makadawat ang matag benepisyaryo og kapin 9,280 pesos nga sweldo base sa minimum wage nga 464 pesos kada adlaw, nga ipatuman sugod Hunyo 1 hangtod Hulyo 2026.
Gilauman nga pinaagi niini, mapalig-on ang food security, madugangan ang kita sa mga mag-uuma, ug mamenosan ang epekto sa kalamidad ug klima sa maong lugar.
