Nagpagawas ug bag-ong memorandum circular ang Land Transportation Office (LTO) Davao de Oro gikan sa ilang Central Office, nga nagtumong sa paghatag ug extension sa validity sa driver’s license, student permit, ug rehistro sa tanang sakyanan.
Sa eksklusibong pakighinabi sa Juander Radyo Nabunturan News Team niadtong Abril 29, 2026, gipadayag ni Vernon Canda, Officer III sa LTO Davao de Oro, nga ang tanang dokumento nga mag-expire sugod sa Abril 2026 hatagan ug tulo (3) ka bulan nga extension.
Sumala kaniya, sulod sa maong tulo ka bulan gikan sa petsa sa expiration, dili una kolektahan ug penalty ang mga motorista sa pag-renew sa ilang driver’s license, student permit, ug rehistro sa mga sakyanan.-
Dugang pa, gipasiugda sa LTO Davao de Oro nga magpadayon ang ilang paghatag ug episyenteng serbisyo sa publiko, lakip na ang pagpalig-on sa ilang mga programa nga ipahigayon sa nagkadaiyang komunidad.
