Giklaro sa Zamboanga del Sur Electric Cooperative(ZAMSURECO I) ngadto sa ilang mga konsumidor ang kabahin sa Lifeline Subsidy o discount nga makita sa bayronon sa kuryente matag bulan, alang sa mga kabus nga sector.
Sa pakighinabi sa Juander Radyo News Team ni Melody Andam, OIC Member Education Officer sa ZAMSURECO I, giingon niini nga ang maong lifeline subsidy dugay nang gipatuman ilalom sa Electric Power Industry Reform Act of 2001 o (EPIRA Law) ug na-amendahan pinaagi sa Republic Act No. 11552 niadtong 2022, ug gi-aprubahan sa Energy Regulatory Commission (ERC) ang implementasyon niini.
Dugang pa ni Andam, ang maong charges gamay lamang kaayo sa kantidad nga Php0.01 centavos per kilowatt-hour sa ilang monthly bill og gipatuman sa tanang electric cooperatives sa tibuok Pilipinas ug dili lamang sa ZAMSURECO I.
Gipasabot usab niya nga ang makolektang bayronon alang niini, dili mapabilin sa kooperatiba, kondili direkta kining i-remit sa gobyerno.
Apan, giklaro usab sa opisyal nga dili tanang sakop sa Pantawid Pamilyang Pilipino Program (4Ps) ang makadawat og diskwento, tungod kay adunay mga kondisyon nga dapat sundon sama sa dili molapas sa 50 per kilowatt-hours kada bulan.
