Nadakpan ang usa ka drug priority personality atol sa hiniusang anti-drug operation nga gihimo sa Philippine Drug Enforcement Agency (PDEA) Regional Office 13 – Agusan del Sur Provincial Office ug Bunawan Municipal Police Station sa buntag niadtong nakalabay nga adlaw, sa Purok 1, Barangay San Teodoro, Bunawan, Agusan del Sur.
Narekober sa operasyon ang gibanabana nga kantidad sa shabu nga mokabat sa Php40,800. Lakip sa nasakmit ang usa ka heat-sealed transparent plastic sachet sa shabu nga gibaligya sa poseur buyer ug walo pa ka dugang sachet nga gituohang andam na untang ipang baligya. Nasakmit usab ang buy-bust money ug usa ka puti nga Honda ADV motorcycle.
Ang suspetsado anaa na karon sa kustodiya sa mga awtoridad ug gikatakdang atubangon ang kaso sa paglapas sa Section 5 o pagbaligya og ilegal nga droga ug Section 11 o pagpanag-iya og ilegal nga droga ubos sa Article II sa Republic Act 9165 o Comprehensive Dangerous Drugs Act of 2002.
Matod pa ni PDEA Regional Director Laurefel Gabales, ang kalampusan sa operasyon nagpakita sa lig-on nga panagtinabangay sa PDEA ug Philippine National Police sa pagpakusog sa kampanya batok sa ilegal nga droga.
Giawhag usab ang publiko nga magpabiling magbinantayon ug magpadayon sa pagsuporta sa mga law enforcement agency pinaagi sa pagreport sa mga kadudahang kalihokan sa ilang komunidad aron mapadayon ang kalampusan sa kampanya sa gobyerno batok sa ilegal nga droga.
Photo courtesy: PDEA 13
