Aprubado sa Cebu City Council ang pagpagawas sa ₱625,000 nga cash incentives alang sa mga atleta sa dakbayan nga nakadaog sa ika-33 Southeast Asian Games ug 13th ASEAN Para Games, diin ang matag gold medalist makadawat og hangtod ₱100,000.
Ang resolusyon gisponsoran ni chairperson sa Committee on Youth and Sports Development Councilor Rhea Mae Jakosalem, isip pag-ila sa kahago ug kalampusan sa mga atletang nirepresentar sa Pilipinas. Ang pondo pagakuhaon gikan sa kontribusyon sa Philippine Amusement and Gaming Corporation (PAGCOR) ngadto sa dakbayan.
Base sa aprubadong breakdown, ang gold medalists sama nila Elreen Ann Ando sa weightlifting ug Jerome Bacarisas ug Jasper Cabrera sa softball makadawat og tag ₱100,000 matag usa. Ang silver medalists, lakip sila Gwyneth Berdin Diagan sa esports ug Beariza Ma. Josephine Roble sa para swimming makadawat og ₱50,000.
Ang mga multiple medalists, sama nila Arman P. Dino sa athletics ug Cheryl A. Angot sa chess, makadawat og ₱75,000, samtang ang bronze medalists lakip sila Felix Calipusan Jr. sa karatedo, Rheyjey Ortueste sa sepak takraw, ug Ronil Tubog sa wrestling makadawat og ₱25,000 matag usa.
Sakop sa insentibo ang mga atleta nga mipartisipar sa SEA Games nga gipahigayon sa Bangkok, Thailand niadtong Disyembre 9 hangtod 20, 2025, ug sa ASEAN Para Games niadtong Enero 20 hangtod 26 ning tuiga.
Sumala ni Jakosalem nga giusab ang maong resolusyon aron matul-id ang sayop nga encoding sa pipila ka ngalan sa mga atleta, aron masiguro ang hustong pagrekord sa ilang mga nahimo.
Gilauman nga ipagawas ang insentibo human makompleto ang administratibong proseso sa mga may kalabutan nga opisina sa dakbayan.
PHOTO COUTESY: GMA NETWORK
