Natanggong ang lima ka giingong mga treasure hunter sa Purok 5, Upper Licanan, Panabo City Davao del Norte gabii sa Abril 23, 2026.
Sumala sa report, nakadawat og tawag ang Panabo City Police Station (CPS) alas 8:21 sa gabii gikan sa usa ka miyembro sa City Disaster Risk Reduction and Management Office (CDRRMO), nga nagpasidaan nga adunay mga tawo nga natanggong sa usa ka bangag.
Dali nga gipadala ang mga pulis ubos sa pagpanguna ni PCPT Alex Vitasolo, ang Deputy Chief of Police sa giingong estasyon, aron susihon ang insidente ug maghimo og inisyal nga imbestigasyon.
Sa inisyal nga imbestigasyon, giingon ni Glenn Navarro, anak sa tag-iya sa yuta, nga lima ka tawo ang nagkalot sa maong lugar alang sa giingong pagpangita og bulawan. Samtang nagpadayon sila sa ilang kalihokan, kalit nga adunay nahitabong pagbuto nga maoy hinungdan sa ilang pagkahulog ug pagkakulong sulod sa bangag.
Sa pagkakaron, nagpadayon ang rescue ug retrieval operations nga ginahimo sa Panabo City Police Station, CDRRMO Panabo, Bureau of Fire Protection (BFP) Panabo City ug ilang regional headquarters, lakip ang EOD/PECU Davao del Norte, aron maluwas ang mga na-estranded.
Photo Courtesy : PCPS
