Padayon nga gipatuman sa Department of Labor and Employment (DOLE) Zamboanga del Sur ang Government Internship Program (GIP) aron matabangan ang kabatan-onan nga makabaton og kasinatian sa pagtrabaho sulod sa gobyerno.
Matud ni Yusep Abduhasad, Senior Labor and Employment Officer, matag tuig adunay daghang estudyante ang nakabenepisyo sa programa.
Sa miaging tuig, kapin sa 1,000 ka GIP beneficiaries ang na-deploy, samtang karong tuiga, mikabat na sa 150 ka interns ang nadawat.
Sumala sa DOLE Zamboanga del Sur, padayon ang pagdawat ug pag-deploy sa mga interns sa nagkadaiyang opisina aron matubag ang panginahanglan sa manpower, ug sa samang higayon matabangan ang mga aplikante nga makasulod sa kalibutan sa trabaho.
Dugang pa, ang GIP usa sa mga programa sa gobyerno nga nagtinguha sa pagpakunhod sa kawalay trabaho ug paghatag og dugang oportunidad alang sa kabatan-onan sa probinsya.
Gidasig usab ni Engr. Abduhasad ang mga interesadong kabatan-onan nga mo-apply sa programa aron makabenepisyo sa internship ug makakuha og bililhong kasinatian sa pagtrabaho sa gobyerno.
