Gihingusgan sa National Commission of Senior Citizens (NCSC) Region 9 ang signature campaign aron suportahan ang pagpasar sa universal pension nga karon giduso na sa Congress of the Philippines.
Matod ni Walter Abayon, Information Officer sa NCSC Region 9, padayon ang ilang paningkamot sa pagdani sa mga Senior Citizen nga mopirma isip suporta sa maong sugyot.
Gisaysay ni Abayon, ang universal pension nagtinguha nga mahatagan ug regular nga pensyon ang tanang senior citizens bisan pa og wala sila’y kontribusyon sa lain-laing pension systems.
Gidugang niya, dako kini’g tabang ilabina sa mga senior citizens nga walay kaugalingong kita ug nagsalig lamang sa tabang sa pamilya o komunidad.
Gilauman sa NCSC-9 nga pinaagi sa signature campaign, mas mapakusgan ang suporta sa publiko ug mapadasig ang mga magbabalaod nga mapadali ang pag-apruba ang balaod alang sa kaayohan sa mga senior citizens sa tibuok nasud.
