Wala pay dakong kadaot nga natala ang National Irrigation Administration Region 9 (NIA-9) sa mga Irrigators Associations (IAs) nga grabeng naapektuhan sa kakulang sa suplay sa tubig sa irigasyon rehiyon 9.
Kini subay sa gibutyag ni Engr. June Nathaniel S. Plaza, Regional Manager sa NIA Region 9 sa pakighinabi sa Juander Radyo News Team.
Niya pa, bisan pa sa kasamtangang kondisyon sa panahon, padayon ang monitoring sa ahensya aron masiguro ang igo nga tubig para sa mga umahan ug malikayan ang posible nga epekto sa umaabot nga planting season.
Gisaysay ni RM Plaza, sa karon kanunay andam ang ilang buhatan sa paghimo ug mga lakang aron mapugngan ang pagkalangan sa pagpananom sa mga mag-uuma sa posibleng epekto sa El niño.
Gipasalig usab ni RM Plaza, kun mo-epekto man ang El Niño sa mga kaumahan duna ray daghang pamaagi nga mahimo ang NIA-9, sama sa pag-operate sa mga Solar Irrigation Projects nga anaa sa nagkadaiyang bahin sa rehiyon 9.
