Walay natalang pagsaka sa retrenchment ug illegal termination sa trabaho sa probinsya sa Zamboanga del Sur bisan pa sa giatubang nga krisis sa nasud.
Sumala sa Department of Labor and Employment o DOLE Zamboanga del Sur, nagpabiling lig-on ang kahimtang sa panarbaho sa maong probinsya.
Sa pakighinabi sa Juander Radyo News Team kang Engr. Yuseph Abduhasad, Senior Labor Officer III, iyang gipahayag nga wala’y dakong pagtaas sa mga reklamo kabahin sa illegal dismissal.
Matod pa niya, ang kasagarang mga reklamo nga ilang nadawat mao gihapon ang naandan, ug padayon ang ilang inspection sa mga kompanya ug establisyemento.
Kini nga mga lakang, sumala pa niya, nakatabang aron masiguro nga nasunod ang balaod sa panarbaho ug hustong proseso sa pagtangtang sa mga empleyado.
Gidasig usab sa DOLE ang mga trabahante nga magpabiling alerto ug modangop sa ilang opisina kung adunay reklamo o isyu kalabot sa trabaho, aron matubag dayon ug mahatagan og hustong aksyon.
