Nakubkoban ang gipanglubong nga mga klase-klaseng armas ug mga eksplosibo atol sa gihimo nga joint operation sa Philippine National Police Caraga ug Philippine Army sa dakbayan sa Butuan.
Sa impormasyon sa Police Regional Office 13, nadiskubrehan ang mga armas nga gituohang gikan sa Communist Terrorist Group sa Purok 6, Imelda, Barangay Antongalon, niadtong Abril 21, human makadawat og impormasyon gikan sa usa ka concerned citizen.
Gipangulohan sa mga operatiba sa Butuan City Police Station 4, kauban ang 29th Infantry Battalion ug 25th Ordnance Explosive Disposal Team sa Army, ang operasyon nga miresulta sa pagkarekober sa lain-laing klase sa armas.
Lakip niini ang pipila ka rifle grenades, mga magasin sa M16, duha ka M60 barrel nga adunay napapas nga serial number, usa ka handheld radio ug cellphone.
Dako ang pasalamat sa kapulisan sa kooperasyon sa katawhan nga mitabang sa pagreport sa maong kalihokan.
Nagpadayon pa sa karon ang imbestigasyon aron matino ang tinubdan ug tumong sa maong mga armas, ingon man ang posibleng mga indibidwal o grupo nga nagtipig niini sa maong lugar.
