Miabot na sa kapin ₱14.7 milyon ang kinatibuk-ang financial assistance nga na-release sa Department of Trade and Industry (DTI) Surigao del Sur alang sa mga micro enterprises sa lalawigan, base sa pinakabag-ong datos hangtod Marso 15, 2026.
Ang maong pondo gipagawas ubos sa Small Business Corporation (SBCorp) Financing Program, diin 54 ka mga borrowers gikan sa nagkalain-laing lungsod ug syudad sa Surigao del Sur ang nakadawat og pinansyal nga tabang.
Tumong sa programa nga mapalig-on ug mapalambo ang gagmay’ng negosyo pinaagi sa accessible ug abot-kayang financing, ilabi na sa mga Micro, Small, and Medium Enterprises (MSMEs) nga maoy haligi sa lokal nga ekonomiya.
Sumala sa DTI, ang maong inisyatibo kabahin usab sa padayon nga paningkamot sa gobyerno aron matubag ang mga epekto sa ekonomikanhong hagit, lakip na ang mga external factors nga nakaapekto sa kalihokan sa negosyo sa rehiyon.
Nanguna sa nakadawat sa pinakadako nga pondo mao ang Tandag ug Bislig nga adunay 13 ka borrowers matag usa, samtang ang San Miguel adunay 7 ka borrowers.
Ang ubang munisipalidad sama sa Barobo, Bayabas, Cagwait, Cantilan, Carmen, Cortes, Hinatuan, Lanuza, Lianga, Lingig, Madrid, Marihatag, San Agustin, ug Tago nakadawat usab og pinansyal nga suporta pinaagi sa programa.
Ang SBCorp, isip financing arm sa DTI, nagtutok sa paghatag og pautang ug livelihood support nga makatabang sa mga MSMEs nga makabangon, molambo, ug makahatag og dugang oportunidad sa trabaho sa ilang komunidad.
Gilauman sa DTI nga pinaagi sa padayon nga implementasyon sa maong programa, mas daghang lokal nga negosyo sa Surigao del Sur ang molig-on ug makatampo sa mas lig-on nga ekonomiya sa lalawigan.
Photo courtesy: DTI-Surigao del Sur
