Giaksyonan gilayon ug paimbestigahan ni Governor Edwin Jubahib ang nag-viral nga reklamo batok sa Davao del Norte Hospital – Kapalong Zone mahitungod sa alegasyong pagpasagad sa mga kawani niini nga hinungdan sa kamatayon sa amahan ni Sheila Mae Niniel.
Sa iyang Facebook post, gipadangat ni Jubahib ang iyang pahasubo sa Niniel family, uban sa iyang pasalig nga “karon nagadagan na ang imbistigasyon ug makaasa matod pa nga andam maminaw sa mga reklamo ug mulo sa katawhan.”
Makita sa iyang post ang pakigpulong sa gobernador sa management ug staff sa maong hospital, apil ang iyang mga pulong nga katungod sa pamilya sa pasyente ang mo-file og complaint ug dapat kining atubangon sa mga kawani.
Dugang sa Gobernador nga andam siyang mopahamtang sa silot alang sa sad-an nga empleyado base sa resulta sa investigation sa PAIC (Provincial Administrative Investigation Committee).
Photo Courtesy : Provincial of Davao del Norte
