Padayon nga gipakusgan sa Provincial Environment and Natural Resources Office (PENRO) ang mga programa niini ilawom sa Communication Education Campaign aron mapalambo ang kahibalo sa publiko sa importansiya sa biodiversity ug sa panginahanglan nga mapanalipdan ug maatiman ang kinaiyahan, ilabi na ang mga hayop.
Sumala ni Dra. Rita Fe C. Gunn, PENRO Officer, usa sa mga hayop nga angay hatagan og pagtagad ug proteksyon mao ang mga halas o bitin. Matod niya, kasagarang mogawas karon ang mga bitin tungod sa kainit sa panahon.
Gipahinumdoman usab sa PENRO ang publiko nga dili dayon pasakitan o patyon ang mga bitin kondili likayan ug ipahibalo dayon sa mga otoridad o mga eksperto aron nga maatiman ug mabalhin sa luwas nga lugar.
Kabahin kini sa mas gipalapad nga kampanya sa ahensya aron mapreserbar ang biodiversity ug mapadayon ang balanse sa kinaiyahan.
