Mikabat ngadto sa katunga o 50 porsiyento sa mga batan-on nga Pilipino ang adunay pormal nga pinansiyal nga account sa 2025, sumala sa pinakabag-ong survey. Apan, kini mikunhod kumpara sa 56 porsiyento nga natala niadtong 2021, tungod sa pagkunhod sa mga nangutang nga nagmintinar og account sa microfinance institutions ug mga kooperatiba.
Base sa resulta sa 2025 Consumer Finance and Inclusion Survey, nga gihimo sa Bangko Sentral ng Pilipinas, nagpakita nga ang mga account naglakip sa bangko, e-wallet, ug uban pang transaction accounts. Ang survey naglangkob sa 10,836 ka mga adulto ug adunay 81 porsiyento nga response rate.
Gilauman unta sa BSP nga mosaka ang account ownership ngadto sa 70 porsiyento pag-abot sa 2023, ilabi na tungod sa pagsaka sa paggamit sa cashless payments panahon sa COVID-19 pandemic. Apan, pagkahuman sa pandemya, nabag-o ang mga gusto sa mga nangutang kung asa sila mangayo og kredito.
Usa sa mga hinungdan sa pagkunhod mao ang mga account nga konektado sa pautang gikan sa microfinance institutions ug kooperatiba. Ang account sa microfinance mikunhod gikan sa 9 porsiyento ngadto sa 5 porsiyento, samtang ang sa kooperatiba mikunhod gikan sa 5 porsiyento ngadto sa 2 porsiyento.
Nakita usab ang pagkunhod sa pangutang gikan niini nga mga institusyon. Ang loan incidence sa microfinance mikunhod gikan sa 10 porsiyento ngadto sa 6 porsiyento, samtang ang sa kooperatiba niubos gikan sa 4 porsiyento ngadto sa 1 porsiyento.
Sa laing bahin, nagpabilin nga lig-on ang paggamit sa e-money accounts nga anaa sa 36 porsiyento sa populasyon—nga maoy nag-unang nagpalambo sa financial inclusion. Ang pagpanag-iya og bank account nagpabilin usab sa 23 porsiyento.
Sumala sa BSP, ang komposisyon sa kredito milambo tungod kay mas daghan na ang nangutang gikan sa pormal nga mga institusyon kaysa sa impormal nga paagi. Nagpasabot kini og progresong padulong sa mas luwas ug mas reguladong merkado sa pautang, bisan pa man nga ang microfinance institutions nagpabilin nga nag-unang tinubdan sa pautang sa nasud.
Photo Courtesy: INQUIRER.NET
