Daling gipalihok sa 10th Infantry (Agila) Division ang ilang Humanitarian Assistance and Disaster Response (HADR) units human sa magnitude 7.0 nga linog nga miigo sa pipila ka bahin sa Mindanao Hunyo 8, 2026.Β
Sa dihang nadawat ang taho bahin sa hitabo, gipataas dayon sa dibisyon ang alert level sa ilang mga yunit ug gipadala ang mga disaster response team aron motabang sa mga apektadong komunidad.
Lakip sa gipalihok nga mga pwersa ang 27th Infantry Battalion, 28th Infantry Battalion, Task Force GENSAN, 1002nd Infantry Brigade, ug 10th Emergency Response Company.
Nagpahigayon sila og mga operasyon sa pagluwas ug pagtubag sa kalamidad, pagtimbang sa kadaot, paglimpyo sa mga dalan nga nababagan, ug uban pang humanitarian assistance aron masiguro ang kaluwasan sa mga residente nga naapektuhan sa maong pagtay-og.
Sumala kang Major General Alvin Luzon, Commander sa 10th Infantry Division, padayon nga anaa sa mga lugar nga naapektuhan ang ilang mga tropa aron motabang sa mga komunidad.
Dugang niya, hugot ang koordinasyon sa dibisyon uban sa Office of Civil Defense, lokal nga kagamhanan, Philippine National Police, Bureau of Fire Protection, ug uban pang ahensya aron mapadayon ang episyenteng paghatag og tabang ug pag-atiman sa kaayohan sa mga Mindanaoan niining panahon sa kalisdanan.
Photo Courtesy : 10TH Infantry Division
