Patay ang usa ka 11-anyos nga batang lalaki sa Napan, Goma, Digos City human napaakan ug itoy. Base sa inisyal nga impormasyon, wala dayon misulti ang maong biktima ngadto sa iyang mga ginikanan nga napaakan kini, hinungdan nga nadugay ang pagpa check-up ug paghatag og tambal.
Gidala pa sa ospital ang bata apan wala na kini matabang pa. Gipatay usab ang itoy nga giingong nakapaak sa biktima, samtang giawhag ang publiko nga magpakonsulta dayon kung napaakan aron malikayan ang rabies.
Ang rabies usa ka virus nga makuha pinaagi sa pinaakan o kambras sa hayop sama sa iro ug iring. Kini nga virus moatake sa utok ug nerbiyos sa tawo ug mahimong makamatay kung dili matambalan dayon.
Ang mga simtomas niini mao ang mga mosunod: hilanat, sakit sa ulo, kasakit sa napaakan, ug kalisod sa pag-inom og tubig.
Kung napaakan ka, ayaw paglangan, Hugasi dayon ang samad gamit sabon ug daghang tubig sulod sa 10 hangtod 15 minutos. Dayon, adto dayon sa pinakaduol nga health center o doktor aron magpatambal.
Hinumdumi ang rabies malikayan kung mag-amping ug magpabakuna sa inyong mga alagang hayop.
