Dakpan ang usa ka 26-anyos nga lalaki human sa insidente sa pagpangdunggab nga nahitabo sa Purok 6, Barangay Pelocuban sa Tambulig niadtong nakalabay nga adlaw.
Sumala sa Tambulig Municipal Police Station, pag-abot sa kapulisan sa lugar, ang suspek nahuptan na sa iyang igsoon uban sa tabang sa mga miyembro sa Barangay Peacekeeping Action Team o BPAT.
Sa inisyal nga imbestigasyon, nasayran nga giingong hubog ang suspek ug miadto sa balay sa ilang amahan nga armado og sundang samtang nagpamulong og makapahagit nga estorya.
Gisulayan sa biktima nga pakalmahon ang suspek, apan tungod sa daan nang panaglalis sa yuta, misamot ang tensyon hangtod miresulta sa komprontasyon ug pagpangdunggab.
Ang biktima, usa ka 46-anyos nga mag-uuma, nasamdan sa tiyan ug gidala dayon sa ospital aron matambalan.
Samtang ang suspek ug ang gigamit nga hinagiban giturn-over na sa kapulisan, samtang gipangandaman na ang pagsaka sa hustong kaso batok sa suspetsado.
Photo Courtesy: ZSPPO
