Gipangita karon sa mga otoridad ang wala pa ilhing mga suspetsado human kini mangawat sa usa ka panimalay sa magtiayon nga si Rotelia Romo og si Eleazar Romo, sa Pasil, Brgy. Matlang, lungsod sa Isabel, niadtong nakalabay nga adlawa.
Matod pa sa nakuhang pahayag gikan sa mga biktima, nagsugod ang maong insidente sa pagpaniid sa suspek pasado alas 10 sa buntag ug mibalik kini pasado alas 11 sa buntag.
Sa pagbalik sa mga suspek, kalit gibira ang biktima og gipugos kini nga hiloton aron mawad an kinig kusog nga mosukol. Nakuha sa mga suspek ang usa ka bag nga adunay sulod nga kwarta nga nagkantidad ug Php10,000, alahas nga nagkantidad og Php23,000 lakip na ang mga ATM.
Ang modus sa mga suspek mao ang pag-pamaligya ug haplas para makabuhat sa ilang illegal nga plano. Nagpahimangno ang kapulisan ngadto sa publiko nga magbantay niining klasi sa mga tawo aron dili mabiktima.
Sa pagkakaron, padayon pa ang imbestigasyon sa mga otoridad alang sa maong insidente aron mailhan ang mga suspek.
