Gipahugtan karon sa Department of Trade and Industry (DTI) Davao de Oro ang pagmonitor sa presyo sa mga batakang palaliton sa probinsya, ilabi na sa pagsaka sa presyo sa gasolina nga nakaapekto sa gasto sa mga negosyante.
Sa eksklusibong pakigninabi sa Juander Radyo Nabunturan News Team, gipadayag ni DTI Davao de Oro Provincial Director Art A. Hermoso nga naka-implementar ang price freeze sa mga produkto tungod sa deklarasyon sa state of calamity sa probinsya. Busa, hugot nga ginabantayan sa DTI ang pagsunod sa balaod kabahin sa presyo sa mga batakang palaliton.
Matod pa ni Hermoso, adunay ipatuman nga mga lakang batok sa mga supplier o negosyante nga makalapas sa gitakdang presyo nga gipatuman sa ahensya.
Padayon usab ang DTI Davao de Oro sa pagpahimangno sa tanang supplier nga sundon ang gipatuman nga presyo aron malikayan ang posibleng multa ug silot.
