Gidesisyonan sa lokal nga panggamhanan sa Marihatag ang pagkansela sa Abaca Festival 2026 ug pagsuspinde sa ubang kalihukan sa barangay isip pagtubag sa nagkagrabeng epekto sa global nga krisis sa ekonomiya.
Sa opisyal nga pahibalo gikan sa Office of the Municipal Mayor, gipatin-aw nga ang kasamtangang kahimtang sa kagubot sa ubang nasud nakaapekto sa lokal nga ekonomiya, ilabina sa pagsaka sa presyo sa lana.
Lakip sa mga lakang nga ipatuman mao ang pag suspendi sa mga “Araw” matag barangay hangtod sa dugang nga mando. Gimanduan usab ang tanang opisina sa LGU, barangay, ug Sangguniang Kabataan (SK) nga ipagamay, ipahunong, o ipakansela ang mga kalihukan nga dili prayoridad ug magkinahanglan og dako nga gasto sa pondo ug kuryente.
Gipatin-aw sa LGU nga ang mga pondo nga gitagana unta alang sa pista ug uban pang kalihukan ibalhin aron gamiton sa mas importante nga serbisyo publiko. Lakip niini ang pagpalig-on sa mga batakang serbisyo, pagpatuman sa energy conservation measures, ug pag-andam sa posibleng epekto sa krisis.
Gihatagan usab og prayoridad ang paghatag og tabang pang-ekonomiya sa mga residente nga naapektuhan sa padayon nga pagsaka sa presyo sa liquid fuel ug kuryente.
Ang maong mando epektibo dayon sugod, Abril 14, 2026, ubos sa mando ni Mayor Benjamin “Dodoy” Tucong Fazon Jr.
Photo Courtesy: Provincial Tourism Sursur
