Gipangita na karon sa mga otoridad ang usa ka kawatan human makakuha og duha ka unit sa iPhone 13 gikan sa usa ka cellphone store sa lungsod sa San Francisco, Agusan del Sur.
Nagpagawas og alerto ang tag-iya sa tindahan human sa insidente nga nahitabo pasado alas 11 sa buntag , Abril 14, 2026, duol sa Eldy Jun sa ZID Cellphone Accessories and Trading.
Sumala sa biktima, gikawat sa wala mailhing suspek ang duha ka cellphone nga usa ka blue ug usa ka white nga iPhone 13 ug dayong midagan.
Gihulagway pa sa tag-iya ang suspek nga lalaki, niwangon ug adunay tattoo sa lawas, apan hangtod karon wala pa kini mailhi. Gipahimangnoan ang publiko nga magmatngon ug likayan ang pagpalit og mga cellphone nga kadudahan kong asa gikan.
Gihangyo usab ang bisan kinsa nga adunay impormasyon nga makatabang sa pag-ila sa suspek nga ipahibalo dayon sa tag-iya sa tindahan o sa mga otoridad.
Dugang pa, mipahibalo ang kadumalahan sa maong tindahan nga maghatag sila og reward alang sa makahatag og kasayuran aron madakpan ang suspetsado.
Photo Courtesy: Angelica Magno
