Angol ang usa ka babaye human aksidenteng nabanggaan sa motorsiklo samtang mitabok sa dalan, atbang sa Parkway sa Km. 3, Barangay Luna, Surigao City.
Sa impormasyon sa Juander Radyo News Team, nasayran nga ang nakadasmag usa ka motorsiklo nga kolor itom nga Honda Beat 125 nga adunay plakang numero Z7056K, nga gimaneho ni alyas Vic.
Gipasidan-an sa Surigao City Traffic Management Office (SCTMO) ang maong insidente ug mipadayag sa pagpahugot sa kampanya batok sa mga drayber nga dili mohunong ug mohatag og prayoridad sa mga motabok sa pedestrian lane.
Sumala sa SCTMO nga nabiktima ang maong babae gumikan sa kakulang ug disiplina nga drayber.
Gipasabot sa SCTMO nga ang pedestrian lane gidisenyo aron mapanalipdan ang kinabuhi sa mga tawo, ilabi na sa mga bata, tigulang, ug uban pang vulnerable nga sektor.
Base sa City Ordinance No. 228 o Comprehensive Traffic Code of Surigao City, ang maong insidente gi-ila isip reckless driving.
Sa pagkakaron, nakig-alayon na ang SCTMO sa LTO alang sa angay ug legal nga aksyon batok sa drayber.
Nagpahimangno usab ang SCTMO sa tanang motorista nga maghinay duol sa pedestrian lane ug hatagan og prayoridad ang mga motabok aron malikayan ang susamang insidente.
