Samad ang naangkon sa usa ka 23-anyos nga mananagat human kini gidunggab sa iyang ka live-in partner sa Purok Banggus, Barangay Baganian, Tabina, Zamboanga del Sur niadtong Abril 13, 2026.
Sumala sa inisyal nga imbestigasyon sa kapulisan, bag-o lang miuli ang biktima gikan sa pagpanagat og nahitabo ang panaglalis sa iyang partner tungod sa gikaingong problema sa kwarta.
Nisamot ang tensyon hangtod nga miresulta kini sa pagpangdunggab sa suspetsadong babaye, nga 27-anyos ang pangidaron, gamit ang kutsilyo ngadto sa biktima.
Bisan pa sa samad nga naangkon sa ubos nga bahin sa likod, nakapangayo gihapon og tabang sa mga silingan, hinungdan nga dali siyang nadala sa Tabina Rural Health Unit ug sa karon luwas na ang iyang kahimtang.
Human sa insidente, midagan ang suspetsado padulong sa wala matinong direksyon. Padayon karon ang follow-up investigation sa kapulisan aron madakpan ang suspetsado.
Padayon ang pahimangno sa mga awtoridad nga likayan ang bayolenteng panaglalis aron malikayan ang susamang problema.
