Gilunsad sa Carrascal LGU ang usa ka fuel subsidy program aron suportahan ang mga tricycle operators nga naapektuhan sa padayon nga pagsaka sa presyo sa lana, isip kabahin sa ilang paningkamot sa pagpanalipod sa panginabuhian sa mga residente.
Ang maong programa gipangulohan ni Carrascal Mayor Joseph L. Urgel ug gi-institutionalize pinaagi sa Executive Order No. 23, series of 2026, nga nagtumong sa paghatag og direktang tabang pinansyal sa mga transport workers aron mapagaan ang ilang galastuhon sa operasyon.
Sa unang hugna sa implementasyon, ang mga tricycle operators ang maoy nag unang benepisyaryo sa subsidy. Tumong niini nga mapabilin nga lig-on ang plete ug malikayan ang posibleng pagsaka niini nga mahimong makabug-at sa mga pasahero.
Sumala sa LGU, plano usab nilang palapdan ang programa aron maapil ang mga mag-uuma ug mananagat, base sa padayon nga konsultasyon uban sa mga stakeholder, aron masuportahan ang ubang sektor nga apektado sa taas nga presyo sa lana.
Gipasabot sa lokal nga gobyerno nga ang maong lakang kabahin sa mas lapad nga inisyatibo aron mapalig-on ang ekonomiya sa lungsod ug matabangan ang mga sektor nga direktang naapektuhan sa kasamtangang kahimtang sa presyo sa fuel.
Photo courtesy: MIO-Carrascal
